जल शक्ति मंत्रालय अर पर्यावरण, वन अर जलवायु परिवर्तन मंत्रालय री ओर ऊं थावर ने देश मांय जल शक्ति अभियानः कैच द रेन-2025 री सरुआत करी ज्यी। जल शक्ति मंत्री सी.आर. पाटिल हरियाणा रा पंचकुला ऊं ईं अभियान री सरुआत कीनी। अभियान रा तैत आब-ओ-हवा मांय बदलाव अर पाणी रा हलका ऊं जुड़ी चुनौतियां ने ध्यान राखता थकां पाणी बचावण, बिरखा रो पाणी बचावण अर ज़मीं हेटे पाणी रा लेवल ने ओजू ऊंचो लावण माथे खास ध्यान दियो जा रह्यो है। ईं मौके श्री पाटिल कह्यो के जल जीवन मिशन रे मार्फत मोटी तादाद मांय लोगां ने पीवण रो साफ पाणी मुहैया करायो जा रह्यो है।
जल शक्ति मंत्री थावर ने विश्व जल दिवस रे मौके जल-जंगल-जनः एक प्राकृतिक बंधन अभियान री ई सरूआत कीनी। ईं अभियान रे जरिये नदियां, झरना अर जंगलां बीचे रिश्ता मज़बूत बणाया जावेला। प्रधानमंत्री नरेन्द्र मोदी विश्व जल दिवस रे मौके पाणी बचावण अर सगळां रा विकास ने बधावो देवण री बात ओजू कही।
मुख्यमंत्री भजनलाल शर्मा जनता ऊं पाणी ने बचावण ने आदत बणावण री अपील कीनी है। सोशल मीडिया पोस्ट रे जरिये श्री शर्मा पाणी गंदो व्हेवण ऊं बचावण अर बिरखा रो पाणी भेळो करण बाबत् सगळां ने मिल र सार्थक कदम उठावण सारू कह्यो। विश्व जल दिवस रे मौके प्रदेश मांय ई न्यारी-न्यारी ठोडां जागरूकता कार्यक्रम राख्यी ज्या। बाड़मेर जिला रा आगोर री सरकारी स्कूल मांय संगोष्ठी अर न्यारी-न्यारी होड़ां राख्यी ज्यी।
पाली ज़िला रा साण्डेराव मांय ई पाणी बचावण रो अभियान चलायी ज्यो। बारां ज़िला री शाहबाद पंचायत समिति मांय ब्लॉक स्तर परां राख्यी ज्यी जन सहभागिता कार्यशाला मांय पाणी बचावण री शपथ दिराई ज्यी। झुंझुनूं, बाड़मेर, जैसलमेर अर जालौर ऊं ई खास कार्यक्रम राख्या जावण रा समाचार मिल्या है।