जलशक्ति मंत्री सी.आर. पाटिल कह्यो है के भारत ने साल 2047 तांई जल सुरक्षित देश बणावण रा मकसद ऊं असरदार कार्य योजना माथे काम कर्यो जा रह्यो है। वे बुधवार ने उदयपुर मांय वाटर विज़न सम्मेलन मांय बोल रह्या हा। श्री पाटिल कह्यो के नुवी पी.के.सी. लिंक परियोजना ऊं आवता बगत मांय प्रदेश ने मोटी तादाद मांय पाणी री पूर्ति तैय करी जा सकेला। वे जल जीवन मिशन ने पाणी री परेशानियां आगी करण रो असरदार ज़रियो बतायो। जलशक्ति मंत्री कह्यो के ईं मिशन रा तैत देश रा 15 करोड़ घरां मांय पीवण रो साफ़ पाणी मुहैया करायो जा रह्यो है। केन्द्रीय मंत्री कह्यो के बिरखा रो पाणी भेळो करण सारू लगातार काम चलाया जा रह्या है। कार्यक्रम मांय मुख्यमंत्री भजनलाल शर्मा कह्यो के पाणी बचावण रा जतन कर र पाणी रा हलका मांय खुद रे पाण ऊबा व्हेवण री दिशा मांय आगे बढ़्यो जा सके है। वे कह्यो के जल आत्मनिर्भरता सारू सुव्यवस्थित रोड़ मैप री ज़रूरत है। मुख्यमंत्री कह्यो के इण मांय खेती-बाड़ी अर शहरी जल प्रबंधन अर तकनीकी नवाचार रा पहलू ई शामिल कर्या जावणा चाहिजे। ईं पाछे जलशक्ति मंत्री महाराणा प्रताप गौरव केन्द्र परिसर मांय कर्मभूमि से मातृभूमि अभियान रा तैत जल संचय-जनभागीदारी रा अंतर्गत बोरवैल कार्यक्रम री सरूआत कीनी। कार्यक्रम मांय ओडिशा रा मुख्यमंत्री मोहन चरण मांझी अर त्रिपुरा रा मुख्यमंत्री माणिक साहा, जल शक्ति राज्यमंत्री राजभूषण चौधरी, राज्य रा जल संसाधन मंत्री सुरेश रावत अर केई राज्यां रा जल संसाधन मंत्री मौजूद हा।