जयपुर रा जवाहर कला केंद्र मांय शुक्रवार ने आदि महोत्सव सरू व्ह्यो। राज्यपाल हरिभाउ बागडे़ 10 दिन चालण वाळा ईं महोत्सव रो उद्घाटन कीनो। ईं मौके वे आदिवासी रीति-रिवाज़ ने बचावण माथे ज़ोर दीनो। राज्यपाल कह्यो के आदिवासियां रा कुदरत रा पोषण ऊं जुड्या रीति-रिवाज़ ने समाज कानी ऊं अपनावण री ज़रूरत है। वे जनजातियां रा लोगां रा पूरा विकास सारू वां ऊं जुड़्या हलकां री जरूरतां रो ध्यान राखता थकां वां ने काम-कमाई रा बत्ता ऊं बत्ता मौका मुहैया करावण री जरूरत बताई। आदिवासी नायक बिरसा मुण्डा ने याद करता थकां राज्यपाल कह्यो के वे आदिवासियां रा हक सारू लम्बी लड़ाई लड़ी। कार्यक्रम मांय जनजाति क्षेत्रीय विकास मंत्री बाबू लाल खराड़ी अर जयपुर ग्रेटर री महापौर डॉ. सौम्या गुर्जर ई मौजूद रह्या। ध्यानजोग है के जनजातीय कार्य मंत्रालय रा ट्राइफेड री ओर ऊं राख्यी ज्या ईं महोत्सव रो मकसद जनजातीय कारीगरां ने मंच मुहैया करा र वां री कला अर संस्कृति ने बचावणो है। महोत्सव मांय करीब 120 स्टॉल लगायी ज्यी है, ज्यां मांय राजस्थान, हिमाचल प्रदेश, पश्चिम बंगाल, मध्यप्रदेश, गुजरात, छत्तीसगढ़, उत्तराखंड अर पूर्वोत्तर राज्यां रा 200 ऊं बत्ता जनजातीय कारीगरां कानी ऊं बणायी ज्या भांत-भांत रा सामान रो दरसाव करी ज्यो है। महोत्सव मांय रोजीना सिंज्यां री पोर जनजातीय सांस्कृतिक कार्यक्रम राख्या जावेला।