जयपुर मांय बुधवार ने राइजिंग राजस्थान एजुकेशन प्री-समिट 2024 राख्यी ज्यी। ईं मौके 28 हज़ार 50 करोड़ रुप्या ऊं बत्ती रकम रा 507 करार करी ज्या। समिट रो उद्घाटन मुख्यमंत्री भजनलाल शर्मा कीनो। ईं मौके वे कह्यो के राइजिंग राजस्थान रा तहत हाल तांई निवेशकां सागे 18 लाख करोड़ रुप्या ऊं बत्ती रकम रा करार करी ज्या है। वे कह्यो के प्रदेश मांय निवेश व्हेवण ऊं नौकरी-धंधा रा मौका बधेला। मुख्यमंत्री कह्यो के मोटा शहरां सागे कस्बा अर तहसील लेवल माथे ई शिक्षण संस्थावां विकसित व्हेवणी चाहिजे। ईं मौके उपमुख्यमंत्री डॉक्टर प्रेमचंद बैरवा, युवा अर खेल मामलात् मंत्री राज्यवर्धन राठौड़ ई मौजूद रह्या। कार्यक्रम मांय शिक्षा मंत्री मदन दिलावर प्रदेश मांय निवेश सारू भामाशाहां रो आभार जतायो। राइजिंग राजस्थान ग्लोबल इन्वेस्टमेंट समिट रा ज़िला स्तर रा कार्यक्रम रा तहत भरतपुर मांय काल इन्वेस्टमेंट मीट राख्यी जावेला। इण मांय 1 हज़ार 446 करोड़ रूप्या ऊं बत्ता निवेश रा करार कर्या जावण रा आसार है। आं करार रा तैत कर्या जावण वाळा कामां रे ज़रिए 6 हजार ऊं बत्ता लोगां ने नौकरी-धंधा रा मौका मिलेला। कारोबारियां सारु ऑनलाईन तरीका ऊं करार करण बाबत् राजनिवेश पोर्टल माथे व्यवस्था करी ज्यी है।