जयपुर मांय बुधवार सूं एशियाई प्रशांत पोस्टल लीडर फोरम री सरूआत व्ही। तीन दिन रो यो फोरम यूनिवर्सल पोस्टल यूनियन (यूपीयू) अर डाक महकमा री कानी ऊं राख्यो जा रियो है। डाक हलका री खास चुनौतियां रो हल काढबा अर साझेदारी रे सागे डाक नेटवर्क ने मजबूत करबा खातर यो फोरम राख्यो गयो है। इण मांय एशिया प्रशांत हलका रा 30 देशां रा डाक अहलकार विशेषज्ञ अर सदस्य भाग ले रिया है। केन्द्र सरकार री डाक महकमा री सचिव वंदिता कौल उद्घाटन सत्र मांय शामिल व्ही। मीडिया सूं बातचीत मांय वणा कया के फोरम रे जरिये आपसी तालमेल ने बढावो दियो जा रियो है अर एक दूजा सागे अनुभव साझा करया जा रिया है। वठी ने भारतीय डाक संघ रा अहलकार ठाकुर सुभाष सिन्हा बताया के विश्व डाक संघ री कानी ऊं पैली बगत जयपुर मांय इण भांत रो आयोजन कर्यो गयो है। वणा बताया के भारत रो डाक नेटवर्क दुनिया रा बेहतरीन तंत्र मांय भेळो है अर लगातार इण रा कामां मांय बढोतरी व्हे री है।