जयपुर मांय गुरूवार ने ब्रिक्स देशां रा उद्योग अर व्यापार मंत्रियां री मीटिंग सरू व्ही। भारत री सदारत मांय व्हे रर्ही इं मीटिंग मांय वैश्विक करोबार, एमएसएमई, डिजिटल सेवावां अर आपूर्ति श्रृंखला समेत केई खास मुद्दां माथे विचार कर्यो जा रह्यो है। ईं सागे ई नुवी औद्योगिक क्रांति ऊं जुड़ी भागीदारी, डिजिटल करोबार अर स्थानीय मुद्रा मांय कारोबार ने बधावो देवण परां ई मंथन चाल रह्यो है। मीटिंग मांय शामिल व्हेवण सारू जयपुर पधार्या उद्योग मंत्री पीयूष गोयल हवाई अड्डा माथे खबरनवीसां सागे बातचीत करता थकां कह्यो के प्रधानमंत्री नरेन्द्र मोदी री सदारत मांय सितम्बर महीना मांय नई दिल्ली मांय व्हेवण वाळा ब्रिक्स सम्मेलन ऊँ पैली जयपुर मांय व्हे रही आ मीटिंग घणी खास है। श्री गोयल कह्यो के दुनिया री माली व्यवस्था ने आगे बधावण मांय भारत खास केन्द्र रा तौर ऊं काम कर रह्यो है। जयपुर मांय इण ई महीना ब्रिक्स री माली मामलां ऊं जुड़ी मीटिंग राख्यी जावेला। ईं सागे ई पर्यटन कार्य समूह अर ब्रिक्स देशां रा पर्यटन मंत्रियां री मीटिंग ई व्हेला।