चित्तौड़गढ़ मांय मीराबाई री जयंती रे मौके मीरा महोत्सव रो आयोजन कर्यो जावे। काले देर रात सरू व्ह्या तीन दिन रा महोत्सव रे तहत केई रंगारंग कार्यक्रम व्ह्या रह्या है। म्हारा खबरनवीस बतायो के दीतवार ने न्यारा-न्यारा हलकां रा लोक कलाकार आप री प्रस्तुतियां देवेला। ध्यानजोग है के केंद्रीय संस्कृति अर पर्यटन मंत्री गजेंद्र सिंह शेखावत काले मीरा महोत्सव री सरूआत करी ही। चित्तौड़गढ़ किला रा फतेह प्रकाश महल मांय व्ह्या उद्घाटन जळसा मांय केंद्रीय मंत्री मीरा बाई रा त्याग अर बलिदान ने याद दिराया। ई मौके वणा मीरा बाई माथे छापी ज्यी एक पोथी रो विमोचन ई कर्यो। ई दौरान जन नुमाइन्दा अर अहलकारा रे साथै दूजा लोग ई मौजूद रह्या। उठिने पाली मांय चाल रह्या रणकपुर महोत्सव रो दीतवार ने समापन व्हे रह्यो है। आज दूजे अर आखिरी दिन जीप सफारी, मूंछ होड़, घोड़ा दौड़, रस्साकसी, मिस्टर अर मिसेज गोड़वाड़ समेत केई होड़ा व्ही।