गुरू गोविन्द सिंह जी री जयंती सोमवार ने मनाई जावेला। प्रकाशोत्सव ने ले र हनुमानगढ़ ज़िला रा टिब्बी कस्बा मांय दीतवार ने नगर कीर्तन निकाळी ज्यो। नगर कीर्तन री सरूआत श्री गुरुद्वारा सिंह सभा ऊं पंज प्यारां री अगुवाई मांय व्ही। नगर कीर्तन रो गांव मांय ठौड़-ठौड़ फूल बरसा र स्वागत करी ज्यो। राज्यपाल हरिभाऊ बागडे़ खालसा पंथ रा संस्थापक दसवां गुरू गोविन्द सिंह जी रा प्रकाशोत्सव रे मौके शुभकामनावां दी है। श्री बागडे आप रा संदेश मांय कह्यो के गुरू गोविन्द सिंह सिखां रा दसवां गुरू होवण रे साथै ई संत सिपाही हां। वणा रो संपूरण जीवन त्याग, तपस्या अर बलिदान रा गुणां ऊं भर्यो हो। मुख्यमंत्री भजन लाल शर्मा ई गुरू गोविन्द सिंह जी री जयंती माथे प्रदेशवासियां ने शुभकामनावां दी है। मुख्यमंत्री ई मौके प्रदेशवासियां ऊं गोविन्द सिंह जी रा जीवन मूल्यां ने अपणावण री ई अरज करी।