मुख्यमंत्री भजन लाल शर्मा री सदारत मांय गुरूवार ने राज्य मंत्रिमण्डल री मीटिंग राख्यी ज्यी। इण मांय समान नागरिक संहिता-यू.सी.सी. रो मसौदा अर राज्य वृक्ष खेजड़ी समेत दूजा रूखड़ां री गैर-कानूनी अर अन्धा-धुंध कटाई ने रोकण सारू ट्री प्रोटेक्शन बिल-2026 रा करड़ा प्रावधानां रा मसौदा ने मंजूरी दीरीजी। ईं सागे ई सरकारी कर्मचारियां रा सेवा नियमां मांय रियायत अर अक्षय उर्जा परियोजनावां सारू जमीं आवंटन रा नियमां मांय बदलाव ऊं जुड़्या फैसला ई करी ज्या। मीटिंग पाछे उपमुख्यमंत्री डाॅ. प्रेमचन्द बैरवा, संसदीय कार्य मंत्री जोगाराम पटेल अर जल स्वास्थ्य अभियांत्रिकी मंत्री कन्हैया लाल चैधरी खबरनवीसां ने मीटिंग मांय लिया ज्या फैसलां री जाणकारी दीनी। श्री पटेल बतायो के राजस्थान समान नागरिक संहिता बिल-2026-यू.सी.सी. रा मसौदा ने मंजूरी दे दीरीजी। मसौदा रा तैत ब्याह, तलाक, उत्तराधिकार, भरण-पोषण अर लिव-इन ऊं जुड़्या मामलां मांय राज्य मांय एक सरीखा कानून लागू कर्या जावेला, हालांकि आदिवासी समुदाय ने यूसीसी रा दायरा मांय शामिल नी करण रो प्रस्ताव है। ईं सागे ई राज्य मांय पर्यावरण ने बचावण सारू वृक्ष संरक्षण विधेयक 2026 लावण रो फैसलो ई करी ज्यो। ईं रा तैत खेजड़ी, रोहिड़ा अर पीपल समेत 29 भांत रा रूंखड़ां ने संरक्षित श्रेणी मांय राखण रो प्रस्ताव करी ज्यो है। उपमुख्यमंत्री डाॅ. बैरवा खबरनवीसां ने बतायो के कैबिनेट री मीटिंग मांय राज्य मांय सरकारी सेवावां सारू सेवा नियम 1951 मांय बदलाव री ई मंजूरी दीरीजी है। ईं रा तैत गुजर्या सरकारी कर्मचारियां रा बेटा री बहू ने ई सरकारी कर्मचारी री मौत री सूरत मांय अनुकम्पा नियुक्ति रो फायदो देवण रो प्रस्ताव है। कोख मांय दूजा रो बाळक पाळबा वाळी मायड़ां ने नब्बे दिन रो मातृत्व अवकाश देवण रो प्रस्ताव ई मंजूर करी ज्यो। सगळी सरकारी सेवावां मांय तरक्की सारू अनुभव री शर्त मांय दो साल री छूट देवण अर एकली महिलावां ने मिलण वाळी चाइल्ड केयर लीव अब 3 री बजाए 6 दौर मांय दी जावेला। जलदाय मंत्री कन्हैया लाल चैधरी बतायो के हर घर नळ ऊं पाणी पूगावण रा फैसला रा बारा मांय ग्राम जल स्वछता कमेटी बणायी ज्यी ही, जिण रा मकसद ने पूरो करण सारू इण ऊं जुड़्या प्रावधानां ने ई मीटिंग मांय मंजूरी दीरीजी।