गुरूवार ने लौह पुरुष सरदार वल्लभ भाई पटेल री जयंती मणायी जावेला। ओे दिन राष्ट्रीय एकता दिवस रा तौर ऊं ई मणायो जावेला। ईं मौके मुख्यमंत्री भजनलाल शर्मा वां रा संदेश मांय कह्यो के सरदार पटेल देश ने एक राखण मांय खास काम कीनो। वे कह्यो के आज रो मोटो, एक अर सुनहरो भारत सरदार पटेल री कूटनीति अर दूर री सोच रो नतीजो है। मुख्यमंत्री जनता ऊं देश री एकता अर अखण्डता बणायी राखण सारु भाईचारा री भावना मज़बूत करण बाबत् कह्यो। सरदार पटेल री जयंती रा सिलसिला मांय देश मांय सतर्कता जागरुकता सप्ताह मनायो जा रह्यो है। आज बीकानेर मांय पंजाब नेशनल बैंक री ओर ऊं वॉकेथॉन राख्यी ज्यी। केन्द्रीय विधि अर कानून मंत्री अर्जुनराम मेघवाल हरी झंडी बता र वृद्धजन भ्रमण पथ रे आगे ऊं वॉकेथॉन ने रवाना कीनी। ईं मौके मेघवाल कह्यो के देश री बरकत मांय हर एक रेहवासी रो खास काम है। राष्ट्रीय एकता दिवस रा सिलसिला मांय आज प्रदेश रा केई जिलां मांय कार्यक्रम राख्यी ज्या। नीम का थाना मांय जिला कलेक्टर अहलकारां अर कर्मचारियां ने शपथ दिरायी।