खाद्य मंत्री सुमित गोदारा मंगलवार ने विधानसभा मांय कह्यो के राज्य सरकार ऑन लाइन प्लेटफॉर्म्स रे मार्फत घर-घर जा र सामान पूगावण वाळां अर असंगठित हलका मांय काम कर रह्या मजूरां ने सामाजिक सुरक्षा देवण अर वां रा भला सारु राज्य रा बजट मांय साढे तीन सौ करोड़ रुप्या रो प्रावधान करी ज्यो है। सरकार गिग एंड अनऑर्गेनाइज्ड वर्कर्स डेवलपमेंट फण्ड बणावण रो ऐलाण ई कीनो है। खाद्य मंत्री सदन ने बतायो के ई-श्रम पोर्टल माथे 3 मार्च तांई एक करोड़ 45 लाख 75 हजार 855 कामगारां रा नाम मांड्या जा चुक्या हा। वे बतायो के प्रदेश मांय राशन री दुकानां सारू 505 आवंटन सलाहकार समितियां बणायी ज्यी है। मंत्री बतायो के जयपुर जिला मांय नुवी आवंटन सलाहकार समितियां बेगी ई बणायी जावेला। गृह राज्यमंत्री जवाहर सिंह बेढम सदन मांय कह्यो के सरकार साइबर अपराधां माथे काबू करण सारू लगातार कोशिश कर रही है। इंर् सारू केन्द्र सरकार री मदद ऊं हेल्पलाइन नम्बर ई जारी करी ज्यो है। वे बतायो के राज्य सरकार नुवा सुबीतां वाळी से 112 गाड़ियां पुलिस थाणा ने मुहैया करायी है। बेढम साफ कीनो के पुलिस रा सिपाहियां रा भोजन अर वर्दी भत्ता मांय बधोतरी रो फिलहाल कोई प्रस्ताव नी है। वे कह्यो के पुलिस वाळां ने सप्ताह मांय एक दिन छुट्टी देवण रो ई कोई प्रस्ताव फिलहाल नी है। वे कह्यो के सरकार भर्ती परीक्षावां रा पेपर लीक करण अर नकल रा वाकया रोकण सारू पूरी सावचेती राख रही है।