कोटा मांय सोमवार ने कोटा महोत्सव सरु व्ह्यो। लोकसभा अध्यक्ष ओम बिरला अर ऊर्जा मंत्री हीरालाल नागर ऊबा गणेश जी रा मिंदर मांय पूजा अर्चना कर र महोत्सव री सरुआत कीनी। ईं मौके श्री बिरला कह्यो के हाडो़ती री कला संस्कृति अर पर्यटन री जाणकारी लोगां तांई पूगावण री सगळां री भेळी ज़िम्मेदारी है। महोत्सव रा तहत सोमवार ने फूड कोर्ट, फोटो प्रदर्शनी, क्राफ्ट बाजार, अमृता हॉट, लघु उद्योग मार्ट और पेंटिंग वर्कशॉप रा कार्यक्रम राख्यी ज्या अर स्थानीय कलाकार सांस्कृतिक प्रस्तुतियां दीनी। सिंज्यां री पोर चंबल माता री महाआरती, दीपदान अर आतिशबाजी रा कार्यक्रम है। चित्तौड़ रा किला माथे राख्यी ज्यो मीरा महोत्सव ई सोमवार ने पूरो व्हे रह्यो है। ईं मौके गायन अर नृत्य रा कार्यक्रम पेश कर्या जा रह्या है। दूजी कानी भरतपुर मांय जिला प्रशासन अर पर्यटन विभाग री ओर ऊं दो दिन रो महाराजा सूरजमल स्मृति समारोह काल सरु व्हेला। ईं मौके काल राजकीय संग्रहालय अर केवलादेव राष्ट्रीय उद्यान मांय मुफ़्त प्रवेश दियो जावेला अर सुजान गंगा नहर मांय बच्चां ने नाव मांय मुफ़्त सैर करायी जावेला। काल महाराजा सूरज मल विश्वविद्यालय मांय इण ऊं जुड़्यो खास कार्यक्रम राख्यो जावेला।