कोटा मांय दीतवार ने अंडर-20 राष्ट्रीय कुश्ती होड री सरूआत व्ही। राजस्थान राज्य कुश्ती संघ री कानी सूं राखी जा री तीन दिवसीय इण होड रो शुभारंभ लोकसभा अध्यक्ष ओम बिरला कर्यो। इण मौके माथे वणा कह्यो की खेलां सूं न सिर्फ खिलाड़ियां बल्कि आम लोगां ने भी नुवो दृष्टिकोण मिले है। श्री बिरला लोगां ने किणी भी परिस्थिति मांय आप रे लगस खातर लगोतार काम करणे री अरज करी। लोकसभा अध्यक्ष हौड़ मांय भाग ले रह्या खिलाड़ियां ने शुभकामनावां देवता थकां वां सूं राष्ट्रीय अर अन्तर्राष्ट्रीय स्तर माथे देश रो गौरव बधाणे रो हेलो कर्यो। प्रतियोगिता मांय देश रा 26 राज्यां अर केंद्र शासित प्रदेशां रा 800 सूं बत्ती पहलवान भाग ले रह्या है। इण मांय चुण्योड़ा श्रेष्ठ पहलवानां ने भारतीय टीम खातिर ट्रायल देणे रो मौको मिलेला। इण मौके माथे ऊर्जा मंत्री हीरालाल नागर, सहकारिता मंत्री गौतम कुमार दक, गृह राज्य मंत्री जवाहर सिंह बेढ़म, सांसद सीपी जोशी, विधायक संदीप शर्मा अर कल्पना देवी, भारतीय कुश्ती संघ रा अध्यक्ष संजय सिंह, राज्य कुश्ती संघ रा अध्यक्ष राजीव दत्ता साथै मोटी तादाद मांय प्रबुद्धजन मौजूद रह्या। होड रे दूजे दिन महिला कुश्ती मुकाबलो व्हेला।