कोटा मांय ग्रीन फील्ड हवाई अड्डा ने वन अर पर्यावरण मंत्रालय री मंजूरी मिल्यां पाछे आवता साल इण ने बणावण रो काम सरू कर्यो जावेला। ओ काम दिसम्बर 2027 तांई पूरो करण री मियाद तैय करी ज्यी है। इण रा पहला दौर मांय 3 हजार 200 मीटर लम्बो अर 45 मीटर चौड़ो रन-वे बणायो जावेला। ईं सागे ई हवाई जहाज़ां ने ऊबा करण सारू क्षेत्र, 20 हजार वर्ग मीटर हलका मांय टर्मिनल बिल्डिंग, हवाई अड्डा मांय दाखिल व्हेवण सारू 14 चेक इन काउंटर बणावण सागे 2 कन्वेयर बेल्ट लगायी जावेला। ओ हवाई अड्डो हर साल 20 लाख मुसाफ़िरां अर हर घंटां 1 हजार यात्रियां रा बूता वाळो व्हेला। देशी उड़ानां मांय काम आ रह्या मोटा हवाई जहाज ई कोटा ऊं उड़ान भर सकेला जद के आवता बगत मांय दिसावर सारू ई जहाज़ उड़ान भर सकेला। ग्रीन फील्ड हवाई अड्डा परिसर मांय हवाई जहाज उडावण री सिखावण देवण सारू फ्लाइंग क्लब अर फ्लाइंग स्कूल ई विकसित कर्या जावेला। ध्यानजोग है के लोकसभा अध्यक्ष ओम बिरला री कोशिशां पाछे रक्षा मंत्रालय लारला साल जुलाई मांय कोटा हवाई हवाई अड्डा सारू एनओसी जारी कीनी ही। ईं पाछे एयरपोर्ट अथॉरिटी ऑफ इंडिया अर राजस्थान सरकार बीचे ईं साल जुलाई मांय करार करी ज्यो हो।