केन्द्र सरकार प्रधानमंत्री सूर्य सरोवर योजना-पीएमएसएसवाई ने मंजूरी दीनी है। ईं सागे ई पीएम किसान योजना अर खेलो इण्डिया री मियाद पांच साल सारू बधावण रो फैसलो करी ज्यो है। प्रधानमंत्री नरेन्द्र मोदी री सदारत मांय आज व्ही कैबिनेट री मीटिंग मांय केई खास फैसला करी ज्या। सूचना अर प्रसारण मंत्री अश्विनी वैष्णव नई दिल्ली मांय खबरनवीसां ने मीटिंग मांय करी ज्या फैसलां री जाणकारी दीनी। वे बतायो के जल निकायां माथे फ्लोटिंग सोलर पेनल अर ऊर्जा भण्डारण प्रणाली सरू करण सारू प्रधानमंत्री सूर्य सरोवर योजना लाई ज्यी है। मंत्री बतायो के ईं सारू पांच हजार 70 करोड़ रूप्या रो बजट राख्यी ज्यो है। वे कह्यो के ईं योजना रा तैत 5 हजार मेगावाट री तैरती सौर फोटोवोल्टेइक परियोजनावां विकसित करी जावेला। श्री वैष्णव कह्यो के ईं सारु जनता री और ज़मीं लेवण री ज़रुरत नी व्हेला। 5 साल री ईं योजना सारु मौजूदा जलाशय, नहरां अर तळाव काम लिया जावेला।