केन्द्र सरकार केंद्रीय कर्मचारियां रा महंगाई भत्ता अर पेंशन लेवण वाळां री महंगाई राहत मांय दो फीसदी री बधोतरी रा प्रस्ताव ने मंजूरी दे दीनी है। आज नई दिल्ली मांय व्ही कैबिनेट री मीटिंग मांय ओ फैसलो करी ज्यो। कैबिनेट री मीटिंग मांय करी ज्या फैसलां री खबरनवीसां ने जाणकारी देता थकां सूचना अर प्रसारण मंत्री अश्विनी वैष्णव बतायो के आ बधोतरी एक जनवरी 2025 ऊं लागू मानी जावेला। इण ऊं केंद्र सरकार रा 48 लाख ऊं बत्ता कर्मचारियां अर पेंशन लेवण वाळा करीब 66 लाख जणां ने फायदो मिलेला। सरकार देश मांय इलेक्ट्रॉनिक सामान बणावण ने बधावो देवण अर इलेक्ट्रॉनिक्स आपूर्ति श्रृंखला ने मज़बूत बणावण सारू लिए इलेक्ट्रॉनिक्स घटक विनिर्माण योजना ने ई मंजूरी दे दीनी। सूचना अर प्रसारण मंत्री बतायो के इण ऊं 91 हजार ऊं बत्ता नौकरी-धंधा रा मौका मिलेला। श्री वैष्णव बतायो के सरकार किसानां ने रियायती रेट माथे खाद मुहैया करावण सारू फॉस्फेटिक अर पोटाशिक खाद माथे खरीफ 2025 री साखां सारू पोषक तत्व आधारित सब्सिडी री रेट ने ई मंजूरी दे दीनी। मंत्री बतायो के कश्तकारां रा भला ने ध्यान राखता थकां डीएपी खाद रा मोल मांय कोई बदलाव नी करी ज्यो है। डी.ए.पी. खाद रो 50 किलोग्राम रो कट्टो एक हजार 350 रुप्या मांय ई मिलतो रेहवेला।