सूचना अर प्रसारण मंत्रालय रा केन्द्रीय संचार ब्यूरो रा न्यारा-न्यारा दफ्तरां री ओर ऊं आज प्रदेश मांय केई ठोड़ां विभाजन की विभीषिका स्मृति दिवस रे मौके चित्र प्रदर्शनी लगायी ज्यी। जयपुर मांय प्रदर्शनी लगायी ज्यी प्रदर्शनी रो उद्घाटन जयपुर री सांसद मंजू शर्मा अर स्वतंत्रता सेनानी रामू सैनी कीनो। ईं मौके सांसद मंजू शर्मा नौजवानां ऊं आज़ादी रो महत्त्व समझण री अपील कीनी। कार्यक्रम रे दौरान स्वतंत्रता सेनानी रामू सैनी कह्यो के देश रो बंटवारो महज़ सरहदां रो बंटवारो नी हो बल्कि आं बगत बण्या माहौल ऊं इंसानियत ने शर्मसार व्हेणो पड्यो हो। ईं मौके केन्द्रीय संचार ब्यूरो री अपर महानिदेशक ऋतु शुक्ला बतायो के जयपुर, जोधपुर, अजमेर अर अलवर रेलवे टेशनां सागे उदयपुर, डूंगरपुर अर आबू रोड रा स्कूल- कॉलेजां अर कोटा रा चम्बल रिवर फ्रंट माथे ई ब्यूरो री ओर ऊं विभाजन विभीषिका स्मृति दिवस चित्र प्रदर्शनी लगायी जा रही है। बीकानेर मांय लगायी ज्यी प्रदर्शनी रो बीकानेर पश्चिम रा विधायक जेठानन्द व्यास उद्घाटन कीनो।