केन्द्रीय मंत्री गजेन्द्र सिंह शेखावत गर्मी रा मौसम ने ध्यान मांय रखता अहलकारां ने सरहदी ज़िला मांय पीवण रा पाणी अर बिजली री सप्लाई रा वाजिब बन्दोवस्त करण रा निर्देश दिया है। श्री शेखावत आज पोकरण री सांकड़ा पंचायत समिति मांय जिला थर रा अहलकारां री मीटिंग ली। केन्द्रीय मंत्री जलदाय महकमां रा अहलकारां ने कंटीजेन्सी प्लान रे तैत 15 अप्रेल तांई नलकूप अर हैण्डपम्प लगावण रा बारा मांय कार्यवाही पूरी करण रा निर्देश दिया। वण जल जीवन मिशन री प्रगति री समीक्षा करी अर मिशन ऊं बच्योड़ा गांव अर ढांणियां रा प्रस्ताव बेगा देवण री बात कही। श्री शेखावत इण ऊं पैला काले पोकरण मांय होळी स्नेह मिलन कार्यक्रम मांय सिरकत करी।