देश मांय सहकारिता रे मार्फत लाखों लोगां रा जीवन मांय बदळाव आयो है। गृह अर सहकारिता मंत्री अमित शाह कह्या के सुधारां, डिजिटलीकरण अर पेशेवर प्रबंधन सूं सहकारिता हलका मांय घणो इजाफो व्ह्यो है। श्री शाह सहकारिता मंत्रालय रा 5 वां थापना दिवस रे मौके राख्या जळसा मांय बोल रह्या हा। वे कह्या के हर एक खेतर मांय बत्तो चोखों प्रदर्शन करबा वाळी पांच सहकारी समितियां ने मान्यता देबा खातिर रैंकिंग ढांचो ऐलान कर्यो गयो है। सहकारी बैंक आज करीब 27 लाख करोड़ रिप्यां रो कारोबार करे हैं, ओ देश री माली व्यवस्था मांय सहकारिता रा बढता योगदान ने दरसावे है। गृह मंत्री कह्या के राज्यां मांय प्राथमिक कृषि ऋण समितियां-पैक्स री गतिविधियां ने बढा र मजबूत कर्यो जा रह्यो है।
श्री शाह कार्यक्रम मांय जयपुर रा सुमेल गांव मांय सहकार वन परियोजना री सरूआत करी। इण मांय 64 एकड जमीं माथे सहकार वन विकसित कर्यो जावेला। जिण मांय खेजडी, रोहिडा अर नीम रा पेड लगाया जावेला। इण मौके मुख्यमंत्री कह्यो के सहकारिता आर्थिक सशक्तिकरण रो जरियो बण्यो है। सहकार से समृद्धि रा मंत्र रे सागे प्रदेश रा हर एक गांव अर ढाणी मांय सहकारिता आन्दोलन पूग्यो है। राज्य री 42 हजार सूं बत्ती सहकारी समितियां सूं एक करोड़ 35 लाख सूं बत्ता सदस्य जुड़्या है। वठिने सहकार सदस्यता अभियान रे तैत 80 लाख 90 हजार सूं बत्ता नुवा सदस्य जोड़्या गया है।