केंद्रीय मंत्रिमंडल प्रधानमंत्री फसल बीमा योजना अर पुनर्गठित मौसम आधारित फसल बीमा योजना जारी राखण रो फैसलो कीनो है। मंत्रिमंडल री मीटिंग पाछे खबरनवीसां सागे बातचीत करता थकां सूचना अर प्रसारण मंत्री अश्विनी वैष्णव आ जाणकारी दीनी। वे बतायो के ई योजना सारू रकम बधा र 69 हजार 515 करोड़ रुप्या कर दीरीजी है। वे बतायो के ईं योजना रे तैत बीमो करावण वाळा किसानां मांय 88 फीसदी नान्हा अर सीमांत काश्तकार है अर आं मांय ऊं 57 फीसदी अन्य पिछड़ा वर्ग, अनुसूचित जाति अर अनुसूचित जनजाति रा है। श्री वैष्णव बतायो के लारला आठ साल मांय काश्तकारां ने फसल बीमा रे पेटे एक लाख 70 हजार करोड़ रुप्या रो चुकारो करी ज्यो है। मंत्रिमंडल डीएपी खाद माथे सब्सिडी बधा र साढे तीन हजार रुप्या प्रति मीट्रिक टन करण री मंजूरी ई दे दीनी। श्री वैष्णव कह्यो के ईं सारू आवण वाळो अतिरिक्त खर्चो केन्द्र सरकार उठावेला। प्रधानमंत्री नरेन्द्र मोदी कैबिनेट रा फैसलां रो स्वागत कीनो। वे सोशल मीडिया रे जरिये कह्यो के नुवा साल रो पहलो फैसलो किसानां ने समर्पित है। केन्द्रीय कृषि अर किसान कल्याण मंत्री शिवराज सिंह चौहान ई मंत्रिमण्डल रा फैसलां रो स्वागत कीनो है।