केन्द्रीय पर्यटन अर संस्कृति मंत्री गजेन्द्र सिंह शेखावत दीतवार ने जोधपुर अर फलौदी जिला री जिला विकास समन्वय अर निगरानी समिति री बैठक ली। केन्द्रीय मंत्री दोन्यू जिलां मांय चाल री केन्द्रीय योजनावां अर सामुदायिक विकास री गतिविधियां रो फीडबैक लेर जरूरी निर्देश दिया। श्री शेखावत दोन्यू जिलां मांय पीबा रा पाणी री समीक्षा करता थकां विभागीय अहलकारां ने गर्मी रा मौसम रे दौरान जरूरी व्यवस्थावां पक्की करबा ने कया। वणा बंद पड्या हैडपम्प अर ट्यूबवेलां री मरम्मत कर पेयजल वितरण रा काम ने प्राथमिकता सूं लेबा ने कया। श्री शेखावत कन्टिनजेंसी प्लान रा इण म्हीणा रे आखिर तांई करबा खातर अहलकारां ने ताममेल रे सागे काम करबा ने कया। वणा जोधपुर अर फलौदी जिलां मांय टीबी रोगियां खातर नि-क्षय मित्रां री संख्या बढावा अर मौसमी बीमारियां माथे काबू करबा खातर योजना बणार काम करबा रा हुकम दिया। बैठक मांय संसदीय कार्यमंत्री जोगाराम पटेल, सांसद पीपी चौधरी अर स्थानीय जनप्रतिनिधियां रे सागे प्रशासनिक अहलकार मौजूद रिया। इण दौरान केन्द्र सरकार री न्यारी न्यारी योजनावां री प्रगति रा बारा मांय बतायो गयो।