केन्द्रीय गृह मंत्री अमित शाह कह्यो है के हिफ़ाजती दस्तां रा सदस्यां रा त्याग, तप अर बलिदान रे कारण म्हां हिफ़ाजत सागे रह सक रह्या हां। वे गुरूवार ने सिरोही ज़िला रा आबू रोड़ मांय ब्रह्मकुमारी संस्थान रा मुख्यालय मांय राख्यी ज्या हिफ़ाजती दस्तां ऊं जुड़्या कार्यक्रम मांय बोल रह्या हा। गृह मंत्री कह्यो के सुरक्षा बल बर्फीली वादियां अर तपता रेगिस्तान मांय ज़िंदगी रा बेहतरीन बगत दे र म्हाणी हिफ़ाजत करे है। वे कह्यो के फ़ौज अर अर्द्धर्सैनिक बलां रा जवानां सागे ई राज्यां री पुलिस ई अंदरूनी हिफाजत बणायी राखण मांय खास योगदान देवे है। श्री शाह कह्यो है के दुनिया ने सब ऊं पैली भारत वसुधैव कुटुंबकम रो संदेश दीनो। गृह मंत्री कह्यो के योग अर आध्यात्म ऊं मन, शरीर, बुद्धि अर आत्मा ने एक रूप कर र ज्ञान रे जरिये प्रगति रा गेला माथे चालण री भारत री जूनी रीत है अर म्हाणो देश ईं रीत ने पूरी दुनिया मांय पूगावण री कोशिश कर रह्यो है। वे कह्यो के प्रधानमंत्री मोदी 21 जून ने अंतर्राष्ट्रीय योग दिवस मनावण रो आह््वान कर र योग री म्हाणी वैदिक परंपरा अर धरोहर ने पूरी दुनिया तांई पूगावण री कोशिश कीनी है। ब्रम्हकुमारी संस्थान रा काम री सराहवणा करता थकां गृह मंत्री कह्यो के ओ संस्थान त्याग, तपस्या अर तेज ऊं दुनिया मांय सादगी, संयम अर मदद रो अनोखो वातावरण बणावण रो काम कीनो है। कार्यक्रम मांय मुख्यमंत्री भजन लाल शर्मा ई विचार बताया।