केन्द्रीय कृषि मंत्री शिवराज सिंह चैहान अल नीनो रा असर री शंका ने ध्यान राखता थकां बुधवार ने नई दिल्ली मांय आला दर्जा रा अहलकारां सागे मीटिंग कीनी। वे कह्यो के केन्द्र सरकार पूरी तैयारी अर साफ रणनीति सागे अल नीनो री चुनौतियां रो सामो करण सारू सक्रिय अर सावचेत है। कृषि मंत्री कह्यो के देश मांय जेठ महीना मांय व्ही कम बिरखा पाछे आषाढ़ मांय हालात सुधर्या है। देश मांय अब कम बिरखा वाळा जिलां री तादाद 262 ऊँ घट र 178 रह ग्यी है। मीटिंग पाछे खबरनवीसां सागे बातचीत करता थकां केन्द्रीय कृषि मंत्री कह्यो के अल नीनो री शंका ने ध्यान राखता थकां पूरी निगराणी राख्यी जा रही है। ई बीचे चैमासा री बिरखा मोड़ी सरू व्हेवण रे कारण सोयाबीन अर कपास री साख माथे असर पड़्यो है। किसानां ने मक्का, बाजरा, मूंग अर बेगी पाकण वाळी अर कम पाणी री जरूरत वाळी साखां री बुवाई री राय दीरीजी है। कृषि मंत्री बतायो के जून महीना मांय चलायी ज्या खेत बचाओ अभियान रा तैत करीब सवा लाख कार्यक्रम राख्यी ज्या अर 80 लाख ऊँ बत्ता किसानां तांई पहुंच बणायी ज्यी। वे बतायो के बीज री उपलब्धता तैय करण सारू करीब पौने दो लाख क्विंटल रो राष्ट्रीय बीज भण्डार बणायी ज्यो है।