केंद्रीय स्वास्थ्य मंत्री जे.पी. नड्डा कह्या के तिरंगो केवल राष्ट्रध्वज नी है बल्कि देश री आन बान शान अर करूड़ो देशवासियां री भावना रो प्रतीक है। वे कह्या के हर घर तिरंगा अभियान दीतवार ने जनव्यापी अभियान रो रूप ले चुक्यो है। जयपुर मांय अभियान रे तैत राज्यस्तरीय तिरंगा रैली री सरूआत रे मौके वणा देशवासियां सूं आपरा घरां माथे तिरंगों फहरा र अनेकता मांय एकता अर राष्ट्रीय अखण्डता बणाया राखबा रो संदेश दियो। इण मौके मुख्यमंत्री भजन लाल शर्मा कह्या के तिरंगा यात्रा जन-जन रा अभियान रा रूप मांय नई पीढ़ी मांय राष्ट्र भावना ने मजबूत करबा रो जरियो बण री है। मुख्यमंत्री कह्या के तिरंगा रो राजस्थान ऊं गहरो नातो है। पैली बगत 15 अगस्त ने लालकिला माथै फहरायो गयो तिरंगो राजस्थान मांय ही तैयार व्ह्यो हो। श्री शर्मा कह्या के इण अभियान री सार्थकता इणी मांय है के हर भारतीय राष्ट्रीय चेतना रा आदर्श अर मूल्यां ने आपरा जीवन मांय अपणावे।जयपुर मांय राख्यी तिरंगा रैली अल्बर्ट हॉल सूं सरू व्हे र बडी चैपड माथे पूरी व्ही। इण मांय विधानसभा अध्यक्ष वासुदेव देवनानी, उपमुख्यमंत्री दिया कुमारी अर प्रेमचन्द बैरवा समेत कैई जनप्रतिनिधि, आर्मी रा जवान, स्काउट गाईड, खिलाड़ी, पैली आळा सैनिकां समेत बड़ी संख्या मांय नागरिक भाग लीना। अभियान रै तैत राज्य री दूजी ठोडा माथे व्ही तिरंगा रैली अर प्रभात फैरी राख्यी ग्यी। इण मांय बड़ी संख्या मांय स्थानीय निवासी अर जनप्रतिनिधि भाग लीना। ध्यानजोग है के दीतवार सूं देशभर मांय हर घर तिरंगा अभियान सरू व्ह्यो है। 17 अगस्त तांई चालबा वाळा इण अभियान रो लगस लोगां ने आपरा घरां माथे तिरंगों फहराबा अर देशभक्ति अर राष्ट्रीय एकता सूं जुड्या कार्यक्रमां मांय भाग लेबा खातर प्रोत्साहित करणों है। इण बरस ओ अभियान राष्ट्रीय गीत ‘वंदे मातरम्’ री 150वीं वर्षगांठ रे सागे मनायो जा रह्यो है। केन्द्रीय मंत्री श्री नड्डा अर मुख्यमंत्री श्री शर्मा जयपुर मांय दीतवार ऊँ 10 अत्याधुनिक रक्त संग्रहण अर परिवहन गाड़ियां ने भी हरी झंडी दिखाई।