केंद्रीय सामाजिक न्याय अर अधिकारिता राज्य मंत्री रामदास अठावले कह्यो है के सरकार पेपर लीक रा वाकया रोकण सारु करड़ो कानून लायी है अर अब पेपर लीक करण रा दोषियां ने दस साल तांई री कैद री सज़ा रो प्रावधान करी ज्यो है। वे आज जयपुर मांय खबरनवीसां सागे बातचीत कर रह्या हा। अठावले नौजवानां ऊं शांति सागे बात रखण री अरज करता थकां कह्यो के सरकार वां री भावनावां समझे है। श्री अठावले बतायो के प्रधानमंत्री आवास ग्रामीण योजना रा तैत चार करोड़ जणां ने मकान दिया ज्या है। मंत्री कह्यो के राजस्थान मांय तीन करोड़ 84 लाख जनधन खाता खोली ज्या है अर दो करोड़ 51 लाख जणां ने मुद्रा योजना रा तैत कर्ज मुहैया करायी ज्या है। श्री अठावले कह्यो के मुख्यमंत्री भजनलाल शर्मा सगळां रा भला सारु काम कर रह्या है। वे ज़मीं रो मालिकाना हक नी राखण वाळा पिरवारां ने पांच एकड़ ज़मीं मुहैया करावण री संभावना री जांच सारु समिति बणा र सर्वे करावण री राय दीनी। मंत्री कह्यो के यूसीसी किण ई सम्प्रदाय सारु नी है अर ओ सब धर्मा रा लोगां रा भला सारु व्हेला।