केंद्रीय युवा मामला अर खेल मंत्री डॉक्टर मनसुख मांडविया, दीतवार ने सिंज्यां नई दिल्ली रा जवाहर लाल नेहरू स्टेडियम मांय पैला फिट इंडिया महोत्सव रो उद्घाटन कर रिया है। उद्घाटन जळसा मांय युवा मामला अर खेल राज्य मंत्री रक्षा खडसे, केई फिल्मी सितारा, पहलवान, फिटनेस शौकीन अर वेलनेस गुरु भी शामिल व्हे रिया है। तीन दिन रा फिटनेस अर वेलनेस फेस्टिवल-फिट इंडिया महोत्सव रो लगस स्वस्थ अर सक्रिय जीवनशैली ने बढावो देणो है। फिट इंडिया महोत्सव रे दौरान रस्सी कूदबा, आर्म रेसलिंग, क्रिकेट बॉलिंग, स्क्वॉट अर पुश-अप चैलेंज समेत केई खेल गतिविधियाँ खास आकर्षण रेवेला। इण मांय भारतीय खेल प्राधिकरण रा राष्ट्रीय खेल विज्ञान अर अनुसंधान केंद्र, लोगां ने पोषण विशेषज्ञां अर मनोवैज्ञानिकां सूं जुड़ी मुफ्त जाणकारी मुहैया करावेला। इण मौके आवता खेलो इंडिया पैरा गेम्स रा शुभंकर, लोगो अर गान रो भी अनावरण करयो जावेला। खेलो इंडिया पैरा गेम्स 20 सूं 27 मार्च रे बीचे दिल्ली मांय व्हेला। इण बीच केन्द्रीय युवा मामला अर खेल मंत्री डॉ. मनसुख मांडविया आज सुंवारे अहमदाबाद मांय साबरमती रिवरफ्रंट माथे “फिट इंडिया – रविवार को साइकिल पर“ अभियान मांय भाग लिया। कार्यक्रम मांय करीब साढे छः सौ साइकिल सवार भाग लीना। कार्यक्रम ने सम्बोधित करता थकां डॉ. मांडविया कया के साइकिल चलाबा सूं प्रधानमंत्री नरेन्द्र मोदी रा ’विकसित भारत’ रा संकल्प ने पूरो करबा मांय इमदाद मिल सके है।