केंद्रीय मंत्रिमंडल 23 हजार 731 करोड़ रुप्या रा खर्च वाळी राष्ट्रीय चक्रीय जैव ऊर्जा योजना गोबरधन ने मंजूरी दे दीनी है। प्रधानमंत्री नरेन्द्र मोदी री सदारत मांय गुरूवार ने व्ही कैबिनेट री मीटिंग मांय दो खास फैसलां ने मंजूरी दीरीजी। सूचना अर प्रसारण मंत्री अश्विनी वैष्णव नई दिल्ली मांय खबरनवीसां ने फैसलां री जाणकारी दीनी। वे बतायो के गोबरधन योजना रे जरिये देश मांय नौकरी-धंधा रा करीब डोढ़ लाख मौका बणेला। साल 2035-36 तांई चलायी जावण वाळी ईं योजना ऊँ खेती-बाड़ी ऊँ मोटी तादाद मांय निकळबा वाळा कचरा, ढ़ांढ़ा-ढोरां रा गोबर, सांठा रा कचरा अर दूजी चीजां ने साफ ईंधन अर जैविक खाद मांय बदल र गांवांई हलकां मांय जनता री आमदनी बधावणो तैय कर्यो जावेला। श्री वैष्णव बतायो के ईं योजना रो मकसद घरेलू कम्प्रेसड बायोगैस रो उत्पादन करीब दस गुणो बधावणो, मोटा पैमाना माथे गैर- सरकारी निवेश करावणो अर देश मांय चक्रीय जैव अर्थव्यवस्था बणावणो है। माली मामलां री मंत्रिमण्डलीय समिति असम मांय 135 किलोमीटर लंबा फोर लेन हाई-वे बणावण री ई मंजूरी दीनी।