केंद्रीय मंत्रिमंडल केन्द्रीय कर्मचारियां सारू एकीकृत पेंशन योजना ने मंज़ूरी दे दी है। इण मांय पेंशन री गारंटी दीरीजी है। सूचना अर प्रसारण मंत्री अश्विनी वैष्णव मंत्रिमंडल री मीटिंग रे पछे काले नुवी दिल्ली मांय बतायो के ई योजनां मांय कम ऊं कम 25 साल री सेवा पूरी करण वाळां कर्मचारियां ने आखिरी रा 12 मीना रा मूल पगार रा औसत री पचास फीसदी रकम पेंशन रा रूप मांय दी जायेला। केन्द्र सरकार रा ई फैसला ने ले र राजस्थान मांय कार्यरत केन्द्रीय कर्मचारियां मांय खुशी री लहर है। उत्तर-पश्चिम रेलवे एम्पलोइज युनियन रा महामंत्री मुकेश माथुर गारंटीड पेंशन योजना री मांग ने यूपीएस मांय ठौड़ दिया जावण माथे केन्द्र सरकार की सरावना करी। कृषि विज्ञान केन्द्र भीलवाड़ा रा ठांवा वैज्ञानिक डॉ. सी.एम यादव पारिवारिक पेंशन तैय कर्या जावण माथे केन्द्र सरकार रो आभार जतायो। ऑल इण्डिया एससी/एसटी रेलवे एम्पलोइज रा अध्यक्ष बी.एल बैरवा कह्यो के यू.पी.एस. रे तैत रिटायर कर्मचारियां ने पूरो फायदो मिलेला, जो सरकार रो सराहवना जोग कदम है।