केंद्रीय आवास अर शहरी मामलात मंत्री मनोहर लाल खट्टर कचरा रा प्रबन्धन अर साधनां ने ओजू काम लेवण ने समय री ज़रूरत बताया है। श्री खट्टर आज जयपुर मांय एशिया अर प्रशांत हलका रा थ्री आर अर सर्कुलर इकोनॉमी फोरम रो उद्घाटन कीनो। ईं मौके वे स्वच्छ भारत मिशन ने देश री मोटी उपलब्धि बतायो। शहरी मामलात् मंत्री राजस्थान सरकार री कोशिशां री सराहवणा करता थकां कह्यो के प्रदेश मांय कचरा रा प्रबंधन सारू बेहतरीन काम कर्यो जा रह्यो है। मंत्री कह्यो के राज्य मांय कचरा प्रोसेसिंग रो बूतो 21 लाख मीट्रिक टन ऊं बधा र 45 लाख मीट्रिक टन करणो तैय करी ज्यो है। ईं सागे ई ग्रीन बजट रा तहत 27 हजार 854 करोड़ रुप्या रा खर्च वाळी परियोजनावां लागू करी जा रही है। श्री खट्टर कह्यो के भारत दुनिया मांय सर्कुलर इकोनॉमी ने बधावो देवण सारू न्यारा-न्यारा देशां रो नुवो गठजोड़ बणावण रो प्रस्ताव रखेला। वे कह्या के ‘वसुधैव कुटुंबकम’ री भावना ने आगे बधाता थकां भारत ‘सिटीज पॉल्यूशन स्कैन फॉर सर्कुलरिटी’ नाम री नुवी पहल रो प्रस्ताव ई करेला। कार्यक्रम मांय मुख्यमंत्री भजनलाल शर्मा कह्यो के राज्य सरकार ई-कचरा रा निपटारा, जैविक खाद काम लेवण, रिफ्यूज डेराइव्ड फ्यूल-आरडीएफ अर ट्रीटेड वॉटर पॉलिसी माथे ई काम कर रही है। वे कह्यो के ईं रे अलावा अढ़ाई सौ करोड़ रुप्या रा खर्च ऊं सर्कुलर इकोनॉमी पार्क अर स्वच्छ अर हरित केंद्र विकसित कर्या जा रह्या है। मुख्यमंत्री कह्यो के प्रदेश मांय लैंडफिल साइट्स ऊं 88 लाख क्यूबिक मीटर कचरा रो निपटारो कर्यो जा चुक्यो है, अर 326 एकड़ ज़मीं ने ओजू काम लेवण सारू तैयार करी ज्यी है। श्री शर्मा कह्यो के राज्य सरकार मुख्यमंत्री सद्भावना केंद्रां रे मार्फत जनता ने बेकार चीजा दान करण अर वां ने ओजू काम लेवण रो सुबीतो दे रही है। मुख्यमंत्री कह्यो के इण ऊं साधनां री बर्बादी कम व्हेला अर जरूरतमंद लोगां ने फायदो मिलेला। राजस्थान इंटरनेशनल सेंटर मांय फोरम रा पांच मार्च तांई चालण वाळा 12वां संस्करण मांय भारत, जापान, संयुक्त राष्ट्र संगठनों अर दूजा एशिया-प्रशांत देशां रा एक हजार ऊं बत्ता नुमाइन्दा, ज्यां मांय नीति बणावण वाळा, उद्योग जगत रा नुमाइन्दा, शिक्षाविद् अर अंतरराष्ट्रीय संगठनां रा जाणकार शामिल है, सिरकत कर रह्या है। फोरम मांय इंडिया पवेलियन, नीति अर महापौरां रो संवाद, तकनीकी हलका रो दौरो, अंतरराष्ट्रीय 3आर व्यापार अर प्रौद्योगिकी प्रदर्शनी अर ‘जयपुर डिक्लेरेशन’ ने अपनावण सरीखा खास कार्यक्रम राख्या जा रह्या है।