विधानसभा आज कांग्रेस रा प्रदेश अध्यक्ष गोविंद सिंह डोटासरा समेत 6 विधायकां ने बजट सत्र रा बाकी दिनां सारू निलंबित करण रो प्रस्ताव पास कर दीनो। सदन मांय विपख रा सदस्यां कानी ऊं हंगामो करता थकां आसन री ओर बढ़बा रा वाकया ने गंभीरता ऊं लेता थकां आ कार्यवाही करी ज्यी। कांग्रेस रा विधायक ईं कार्यवाही रे खिलाफ़ सदन मांय धरणो दे रह्या है। ज्यीं बगत सदन मांय सरकारी मुख्य सचेतक जोगेश्वर गर्ग ओ प्रस्ताव पेश कर रह्या हा, वां बगत ई कांग्रेस रा विधायक वेल मांय नारा लगा रह्या हा। हंगामा अर नाराबाज़ी बीचे जोगेश्वर गर्ग कांग्रेस रा सदस्यां श्री डोटासरा, रामकेश मीणा, अमीन कागज़ी, जाकिर हुसैन गैसावत, हाकिम अली खान अर संजय कुमार ने बजट सत्र रा बच्योड़ा दिनां सारू निलंबित करण रो प्रस्ताव पेश कीनो, ज्यीं माथे वोटिंग करायां पाछे स्पीकर आं सदस्यां ने निलंबित कर दीना। कांग्रेस रा विधायक प्रश्नकाल रे दौरान सामाजिक न्याय अर अधिकारिता मंत्री अविनाश गहलोत रा विवादित बयान री खिलाफ़त करता थकां वेल मांय जा र नारा लगावण लाग्या। इण ई दौरान कुछ विधायक सचिव री कुर्सी तांई पूग ग्या। हंगामा रे कारण आज सदन री कार्यवाही दो दफ़ा टालणी पड़ी। विधानसभा री कार्यवाही अब 24 फरवरी ने संवारे 11 बज्यां ओजू सरू व्हेला।