कांग्रेस रा नेता अर विधायक सचिन पायलट राजस्थान लोक सेवा आयोग मांय बदलाव री ज़रुरत बतायी है। बुधवार ने जयपुर मांय खबरनवीसां सागे बातचीत करता थकां श्री पायलट कह्यो के लारला कुछ बरसां मायं आयोग रा कामकाज माथे उठायी ज्या सवालां ऊं नौजवानां रो पूरी व्यवस्था ऊं भरोसो उठ ग्यो है। वे कह्यो के राज्य सरकार ने ईं बारा मांय तुरत कार्यवाही करणी चाहिजे। श्री पायलट राज्य रा कृषि मंत्री किरोड़ी लाल मीणा कानी ऊं फोन टेप करण रा आरोप वाळा बयान ने गंभीर मामलो बतायो। वे कह्यो के फोन टेप करण रा आरोप रा मामला मांय सरकार ने जवाब देवणो चाहिजे। पायलट कह्यो के गैर-कानूनी तरीका ऊं फोन टेप करण रा मामला री जांच कर र ज़िम्मेदार लोगां रे खिलाफ़ कार्रवाई करी जावणी चाहिजे।