कर्तव्य पूरो करता थकां जान निछावर कर देवण वाळा पुलिस वाळां ने सोमवार ने पुलिस शहीद दिवस रे मौके सिरधा भाव सागे याद करी ज्या। ईं मौके प्रदेश मांय ई न्यारी-न्यारी ठौड़ां कार्यक्रम राख्यी ज्या। जयपुर रा राजस्थान पुलिस अकादमी मांय राज्य स्तर रा कार्यक्रम सागे खून दान शिविर लगायी ज्यो, पौधा रोपी ज्या अर साफ-सफाई रो अभियान चलायी ज्यो। ईं मौके पुलिस महानिदेशक यू.आर. साहू कर्तव्य पूरो करण रे दौरान जान निछावर कर देवण वाळा पुलिस वाळां री याद मांय आरपीए परिसर मांय पौधा रोप्या। चित्तौड़गढ़ मांय राख्यी ज्या कार्यक्रम मांय एस.पी. सुधीर जोशी फूल चढ़ा र शहीदां ने सिरधाभाव सागे याद कीना अर ईं साल शहीद व्ह्या पुलिस वाळां री जाणकारी दीनी। ईं मौके पौधा रोप्यी ज्या अर न्यारा-नयारा पुलिस थाणां, पुलिस लाइन अर दफ्तरां रा पुलिस वाळा मर्जी ऊं खून दान कीनो। श्रीगंगानगर री पुलिस लाइन मांय राख्यी ज्या कार्यक्रम मांय एस.पी. गौरव यादव शहीद व्ह्या पुलिस वाळां ने याद करता थकां अमर जवान ज्योति माथे सिरधा रा फूल चढ़ाया। ईं मौके राख्यी ज्या खूनदान शिविर मांय मोटी तादाद मांय पुलिस वाळा खून दान कीनो। हनुमानगढ़ अर बांसवाड़ा मांय राख्यी ज्या कार्यक्रम मांय पौधा रोपी ज्या अर खून दान शिविर लगायी ज्यो। टोंक मांय राख्यी ज्या कार्यक्रम मांय जान निछावर करण वाळा पुलिस वाळां रा पिरवार वाळां रो मान करी ज्यो अर वां री याद मांय पौधा रोप्यी ज्या।