उपराष्ट्रपति जगदीप धनखड़ कह्यो है के मौजूदा दौर मांय भारत री ओळखाण ऐड़ा देश री है जो किण ई देश रो मोहताज नी है अर भारत री अगुवाई रो असर दुनिया मांय निर्णायक साबित व्हे रह्यो है। वे आज अजमेर कने बांदरसींदरी रा राजस्थान केन्द्रीय विश्वविद्यालय मांय Role of higher education in Viksit Bharat@2047  मुद्दा माथे विद्यार्थियां अर शिक्षकां ने संबोधित कर रह्या हा। उपराष्ट्रपति कह्यो के मौजूदा चुनौती वाळा दौर मांय देश ने लगातार आगे बधावण अर विकसित बणावण मांय नौजवानां री खास जिम्मेदारी है। धनखड़ कह्यो के शिक्षा समानता लावे है अर सगळां ने लगातार सीखता रेहवणा चाहिजे। वे कह्यो के नाकामयाबी स्वभाविक है अर इण ऊं नी डरनो चाहिजे। वे कह्यो के देश मांय बरकत रा मोकळा मौका है अर नौजवानां ने आं रो फायदो उठावणो चाहिजे। पर्यावरण प्रदूषण रो जिक्र करता थकां उपराष्ट्रपति कह्यो के धरती अर पर्यावरण ने बचावण सारू सगळा ने पौधा रोपणा चाहिजे। वे जोड़ायत सागे वां री मां रे नाम रो पौधो रोप्यो। धनखड़ सगळा विद्यार्थियां ऊं मां रे नाम पौधा रोपण री अपील कीनी। उपराष्ट्रपति राष्ट्रवाद अर एका ने लक्ष्य बताता थकां कह्यो के देश ने हमेशा सब ऊं ऊंचो राखणो व्हेला। उपराष्ट्रपति अजमेर जिला रा सुरसुरा अर नागौर जिला रा खरनाल मांय वीर तेजाजी रा मिंदर मांय दर्शन कीना अर जनता री खुशहाली री कामना कीनी।