उपमुख्यमंत्री दिया कुमारी कह्यो है के सरकार रो काल जयपुर कने व्ह्या गैस टैंकर हादसा मांय जख्मी लोगां री जिन्दगी बचावण माथे खास ध्यान है। वे  ईं हादसा मांय ज़ख्मी लोगां रो हाल-चाल पूछण सारू आजजयपुर रा सवाई मानसिंह अस्पताल रो दौरो कीनो। दिया कुमारी बर्न यूनिट मांय बाहरी लोगां रे दाखिल व्हेवण परां करड़ाई ऊं रोक लगावण बाबत् कह्यो ताकि संक्रमण ने रोक्यो जा सके। भाजपा रा प्रदेश अध्यक्ष मदन राठौड़ ई आज एसएमएस अस्पताल रा अधीक्षक डॉ. सुशील कुमार भाटी सागे बातचीत कर र जख्मी लोगां रा स्वास्थ्य रा बारा मांय जाणकारी लीनी। कांग्रेस रा नेता अर राज्य रा पैली वाळा उपमुख्यमंत्री सचिन पायलट ई आज एस.एम.एस. अस्पताल जा र झुलस्योड़ा लोगां रो हाल-चाल पूछ्यो। ईं बीचे काल व्ह्या गैस टैंकर हादसा मांय मरण वाळां री तादाद 12 व्हे ग्यी है। ईं हादसा री फेंट मांय आया 3 जणां हाल ई लापता है। पुलिस हादसा ऊं जुडी एफ.आई.आर. दर्ज कर र घटना रा सगळा पहलुआं री जांच कर रही है। जयपुर रा पुलिस उपायुक्त पश्चिम – अमित बुढानिया आकाशवाणी ने बतायो के हादसा मांय मरण वाळा ज्यां लोगां री लाशां री पिछाण नी व्ही है, वां रा डीएनए सैंपल ले र पिछाण री कोशिश करी जा रही है।