उपमुख्यमंत्री अर वित्तमंत्री दीया कुमारी बुधवार ने विधानसभा मांय माली साल 2025-26 सारू राज्य रो बजट पेश कीनो। बजट मांय नौकरी-धंधा, खेती-बाड़ी बाबत् कर्ज, ईलाज रा सुबीतां रो विस्तार अर बुनियादी ढांचा ने बेहतर बणावण बाबत केई ऐलाण करी ज्या। बजट भाषण रे दौरान वित्तमंत्री दीया कुमारी कह्यो के सरकार राज्य ने साढे तीन सौ अरब डॉलर री माली व्यवस्था बणावणो तैय कीनो है अर लारला बजट मांय करी ज्या ऐलाण मांय ऊं 73 फीसदी रो काम पूरो कर लियो ज्यो है। विधानसभा रा बजट सत्र मांय प्रदेश रो पहलो ग्रीन बजट पेश करता थकां वित्त मंत्री कह्यो के ईं सारू 27 हजार 824 करोड़ रूप्या रो प्रावधान करी ज्यो राजीविका मिशन रा तैत महिलावां ने माली तौर ऊं खुद रे पाण ऊबी करण रा मकसद ऊं प्रदेश मांय 20 लाख लखपति दीदियां बणावणो तैय करी ज्यो है। आं मांय ऊं तीन लाख लखपति दीदियां आवता साल बणायी जावेला। बजट मांय महिलावां सारू पांच सौ ऊं बत्ता पिंक टॉयलेट बणावण रो ऐलाण ई करी ज्यो। प्रदेश मांय सार-संभाळ अर संरक्षण री ज़रूरत वाळी टाबरियां सारू दस ठौड़ां गर्ल्स चाइल्ड केयर इंस्टीट्यूट खोल्या जावेला। आंगनबाड़ी केन्द्रां माथे बच्चां ने सप्ताह मांय 3 दिन ऊं बधा र 5 दिन दूध मुहैया करायो जावेला। 50 करोड़ रूप्या रा खर्च ऊं फिट राजस्थान अभियान चलायो जावेला। ईं सागे ई तकनीकी शिक्षण संस्थानां मांय खेल कोटो लागू करण रो ऐलाण ई बजट मांय करी ज्यो। राज्य री मौजूदा सरकार रो दूजो बजट पेश करता थकां वित्तमंत्री बुजुर्गां, विधवा महिलावां अर दिव्यांगजन री सामाजिक सुरक्षा पेंशन बधा र साढे बारह सौ रूप्या प्रति महीना करण रो ऐलाण कीनो।
प्रदेश मांय हिफाज़ती तंत्र ने मजबूत बणावण सारू राजस्थान नागरिक सुरक्षा कानून बणावण रो प्रस्ताव बजट मांय करी ज्यो। सरदार पटेल सेंटर फॉर साइबर कंट्रोल अर वॉर रूम बणावण सारू साढे तीन सौ करोड़ रुप्या रा खर्च रो प्रावधान बजट मांय करी ज्यो। आवता दो साल मांय पुलिस महकमा ने एक हजार गाड़ियां मुहैया करावण अर पुलिस मांय साढे तीन हजार और ओहदा बणावण रो प्रस्ताव ई बजट मांय करी ज्यो। बजट मांय सरकारी महकमां मांय सवा लाख अर गैर-सरकारी हलकां मांय डोढ लाख भर्तियां रो ऐलाण करी ज्यो। ईं सागे ई राजस्थान रोजगार नीति 2025 लावण रो प्रस्ताव ई करी ज्यो। बजट मांय पांच सौ करोड़ रूप्या रा खर्च ऊं विवेकानन्द रोजगार सहायता केन्द्र बणावण रो प्रावधान करी ज्यो। ईं सागे ई साढे तीन हजार करोड़ रूप्या रो मुख्यमंत्री आयुष्मान आरोग्य योजना कोष बणावण रो ऐलाण ई बजट मांय करी ज्यो। दूरदराज रा हलकां रा लोगां तांई ईलाज रा सुबीता बधावण सारू डॉक्टरां रा साढे 700 अर पैरामेडिकल स्टॉफ रा डोढ़ हजार ओहदा बणाया जावेला। नुवा बणायी ज्या आठ ज़िलां मांय विकास सारू एक हजार करोड़ रूप्या देवण रो ऐलाण बजट मांय करी ज्यो। उपमुख्यमंत्री कह्यो के दो लाख और घरां तांई पाणी पूगावण सारु चार सौ करोड़ रुप्या खर्च कर्या जावेला। विकास री रफ्तार और तेज़ करण सारु राजधानी जयपुर मांय मेट्रो रेल नेटवर्क ने और बधायो जावेला। 12 हजार करोड़ रूप्या रा खर्च ऊं सीतापुरा ऊं टोडी मोड़ तांई मेट्रो रेल चलावण ऊं जुड़्या काम कराया जावेला। ईं सागे ई बजट मांय जगतपुरा अर वैशाली नगर हलकां ने मेट्रो रेल रा सुबीता ऊं जोड़बा सारु ई डी.पी.आर. रो प्रस्ताव करी ज्यो। वित्तमंत्री बजट भाषण मांय परिवहन अर बुनियादी ढांचा रा विकास सारू केई ऐलाण कर्या। बजट मांय करी ज्या ऐलाण रे मुजब प्रदेश मांय 9 नुवा ग्रीन फील्ड एक्सप्रेस-वे बणाया जावेला अर 15 शहरां मांय रिंग रोड़ बणायी जावेला। रोड़वेज़ ने 500 नुवी बसां दी जावेला। राजधानी जयपुर री यातायात व्यवस्था मांय सुधार री मद मांय अढाई सौ करोड़ रूप्या खर्च कर्या जावेला। शहर मांय बीआरटीएस कोरिडोर हटाया जावेला। वित्त मंत्री वां रा भाषण मांय हर पंचायत मांय अटल ज्ञान केन्द्र बणावण री योजना री जाणकारी दीनी। इण ऊं डिजिटल शिक्षा अर सरकारी योजनावां री जाणकारी जनता तांई आसानी ऊं पूगायी जा सकेला। पंच गौरव योजना रा तैत साढे पांच सौ करोड रुप्या रा काम कराया जावेला।
विधानसभा मांय बुधवार ने पेश करी ज्या राज्य रा माली साल 2025-26 रा बजट माथे मिली-जुली प्रतिक्रिया मिली है। मुख्यमंत्री भजनलाल शर्मा बजट ने सगळां रो ध्यान राखण वाळो बताता थकां कह्यो के ओ बजट राज्य रो पूरो विकास तैय करेला। दूजी कानी विधानसभा मांय विपख रा नेता टीकाराम जूली कह्यो के ओ बजट किसानां अर महिलावां रो भलो करण वाळो नी है। भीलवाडा रा सांसद दामोदर अग्रवाल बजट ने किसानां रो भलो करण वाळो बतायो। फैडरेशन ऑफ राजस्थान ट्रेड एण्ड इंडस्ट्रीज रा अध्यक्ष सुरेश अग्रवाल कह्यो के ओ बजट उद्योग अर नौकरी-धंधा ने बधावो देवण वाळो साबित व्हेला।बाड़मेर रा मोट्यार जितेन्द्र चौधरी कह्यो के बजट मांय समाज रा सगळा तबकां रो ध्यान राख्यी ज्यो है। पाली ज़िला रा एक किसान पीएम किसान सम्मान निधि री रकम बधावण अर 35 लाख काश्तकारां ने खेती-बाड़ी सारू कर्ज मुहैया करावण ने चोखी पहल बताई। झुंझुनूं ज़िला मांय मंडावा री डॉ. वंदना गौतम बजट ने महिलावां ने मज़बूत बणावण वाळो बतायो।