उद्योग मंत्री राज्यवर्धन सिंह राठौड़ संयुक्त अरब अमीरात रा निवेशकां ने राजस्थान मांय निवेश रा मौकां रो फायदो उठावण री अपील कीनी है। वे निवेशकां ने भरोसो दिरायो के राज्य मांय स्थिर सरकार है अर आवता करीब चार साल तांई निवेशकां ने बरकत रो पूरो मौको मिलेला। वे मंगलवार ने यू.ए.ई. रा दुबई मांय निवेशकां ने राजस्थान मांय निवेश करण बाबत् न्यौतो देवण सारु राख्यी ज्यी मीटिंग मांय बोल रह्या हा। ईं मौके संयुक्त अरब अमीरात मांय भारत रा महा वाणिज्य दूत सतीश कुमार सिवान कह्यो के भारत अर संयुक्त अरब अमीरात रा आपसी रिश्ता रा सकारात्मक पहलू ऊं निवेशकां ने राजस्थान मांय घणो फायदो व्हेला। दुबई मांय प्रसार भारती रा खास संवाददाता विनोद कुमार बतायो के प्रतिनिधि मंडल कृषि उत्पाद प्रसंस्करण, औद्योगिक पार्क, खनन, पेट्रो रसायन, कपड़ा अर पर्यटन सरीखा हलका मांय भारत रा मजबूत पक्ष री जाणकारी दीनी। मीटिंग रा आखिर मांय राजस्थान सरकार अर संयुक्त अरब अमीरात रा कारोबारी घराणां बीचे न्यारा-न्यारा करार माथे सही करीजी।