उदयपुर शहर मांय काले उपज्या तनाव रे पछे आज हालात काबू मांय है। शांति बंदोवस्त सारू ठौड़-ठौड़ पुलिस जाब्तो तैनात करी ज्यो है। जोनल मजिस्ट्रेट रे साथै रिजर्व पुलिस बल रो बेसी जाब्तो लगायी ज्यो है। उदयपुर ऊं म्हाणा खबरनवीस बतायो है के नगर निगम आरोपी रा पिरवार ने नोटिस दे र गैर कानूनी निमार्ण ध्वस्त कर दियो है। अठिने ज़िला प्रशासन आवता हुकम तांई सरकारी अर प्राईवेट स्कूलां मांय छुट्टी ऐलाण करी है। उदयपुर रा आरे-सारे रा ज़िला मांय ईं वारदात रे पछे सावचेती बधा दीरीजी है। ध्यान जोग है के काले एक पढेसर रे क्लास साथी रे चाकू मारण री वारदात रे पछे उदयपुर मांय तनाव रा हालात व्हे ग्या हा। ई बीचे जयपुर ऊं सवाई मानसिंह अस्पताल रा तीन सदस्यां रो डॉक्टरां रो दल उदयपुर भेजी ज्यो है। राज्य मांय सगळा स्कूलां मांय कैची-चाकू ले जावण माथे रोक लगा दीरीजी है। शिक्षा विभाग ई बारा मांय दिशा निर्देश काड्या है। उदयपुर मांय व्ह्या हिंसक घटना क्रम रे पछे शिक्षा मेहकमो शिक्षाकां कानी ऊं पढेसरां रा स्कूल बस्ता री जांच करण रा हुकम दिया है। जे इण रे बावजूद कोई पढेसर कानी ऊं लापरवाही करी जायेला तो उण रे खिलाफ कार्रवाई करी जायेला।