राज्य रे ऊपर बण्यो कम दबाव रो हलको अबे उत्तर अगुणी राजस्थान माथे परिसंचरण तंत्र मांय बदल ग्यो है। इण ऊं आवता कुछ दिनां तांई प्रदेश रा न्यारा-न्यारा हलकां मांय मौसम रो न्यारो न्यारो रूप देखण ने मिल सके है। कठे ई मझला ऊं तेज बिरखा रा आसार है अर कठे ई उमस भरी गर्मी लोगां री परेशानी बधा सके है। मौसम महकमा मुजब उत्तर अगुणी राजस्थान अर आरे-सारे रा हलका मांय चक्रवाती परिसंचरण तंत्र सक्रिय है। इण रा असर ऊं भरतपुर, बीकानेर अर जयपुर संभाग मांय कठे-ई-कठे हळका ऊं मझला दर्जा री बिरखा होवण रा आसार है। भरतपुर संभाग मांय कुछ ठौड़ां गरज अर तेज हवा रे साथे भारी बिरखा ई दर्ज व्हे सके है। वठे ई 6 ऊं 8 अगस्त रे बीचे अगुणी राजस्थान मांय नुवा परिसंचरण तंत्र रे सक्रिय होवण ऊं मझला ऊं तेज बिरखा री आस है। मौसम केन्द्र जयपुर रा निदेशक राधेश्याम शर्मा बतायो के आथूणी राजस्थान रा बाडमेर, जैसलमेर, बालोतरा अर फलौदी मांय बिरखा री गतिविधियां मांय कमी रा आसार है। इण ऊं उमसभरी गर्मी बणी रह सके है।