पैगम्बर मोहम्मद साहब रो जन्मदिवस ईद मिलाद-उन-नबी सोमवार ने प्रदेशभर मांय उछाव रे साथे मनायो जा रह्यो है। इण मौके मिलाद महफिल अर सीरत जळसां राख्या जा रह्या है। इण मांय पैगम्बर मोहम्म्द साहब रा जीवन अर वां री शिक्षावां रा बारा मांय बतायो जा रह्यो है। इण मौके मिलाद जुलूस भी कड्या ग्या। राजधानी जयपुर मांय दोपहर पाछे जुलूस कड्यो गयो जो घाटगेट सूं रवाना व्हेर कर्बला पुग्यो। डीग रा कामा मांय भी सोमवार सुवांरे नमाज अदा कर न्यारी-न्यारी ठौड़ां सूं जुलूस काड्यो गयो। जैसलमेर मांय काड्या गया जुलूस माथे केई संगठनां कानी ऊं फूल बरसा र भाईचारा री मिसाल पेश करी गयी। भीलवाड़ा मांय लोगां मांय इण पर्व रे चालता खासो उछाव देख्यो गयो। चूरू मांय काड्या ग्या जुलूस मांय देश भक्ति रा नारां रे साथे मोहम्मद साहब ने याद कर्यो गयो। टोंक मांय ईण मौके धन्ना तलाई चौराहा माथे कार्यक्रम राख्या गया अर महफिल-ए-मिलाद सजाई गई।