ईद-उल-फितर सोमवार ने देशभर मांय रीत मुजब उमाव रे साथे मनायो जावे। ई मौके ईदगाहां अर मस्जिदां मांय ईद री नमाज अदा करी ज्यी। राष्ट्रपति अर उप-राष्ट्रपति ईद री शुभकामनावां दी है। प्रधानमंत्री नरेन्द्र मोदी ई ईद-उल-फितर माथे देशवासियां ने शुभकामनावां देवता एक सोशल मीडिया पोस्ट मांय आस जतायी की ओ तिवांर समाज मांय आशा, सद्भाव अर दयालुता री भावना ने बधावेला। वणा सगळां री कोशिश मांय खुशी अर कामयाबी री कामना करी। राज्यपाल हरिभाऊ बागडे ईद-उल-फितर रे मौके प्रदेशवासियां ने बधाई अर शुभकामनावां दी है। अठिने राजधानी जयपुर समेत प्रदेशभर मांय ईद री खास नमाज़ रे मौके घणी तादाद मांय अकीदतमंद जुट्या। ई सारू मस्जिदां मांय सोवणी रोशनी अर सजावज करी ज्यी है। ईद ने ले र बाजार ई गुलजार रिया। लोग देर रात तोई ईद री खरीदारी करता निजर आया। आज घर-घर खीर अर सेवईयां बणायी ज्यी। जोधपुर मांय जालोरी गेट री बड़ी ईदगाह मांय हजारू लोगां ईद री नमाज़ अदा करी। नमाज़ रे पछे लोगां गळे मिल ने एक-दूजा ने बधाई दी। अजमेर मांय खास नमाज़ केसरगंज ईदगाह मांय व्ही। ख्वाजा मोइनुद्दीन हसन चिश्ती री दरगाह री शाहज़हानी मस्जिद मांय ई नमाज़ अदा करी ज्यी। ई मौके दरगाह रो जन्नती दरूजो खोली ज्यो, जठे जायरीन जियारत कर ने दुवावां मांगी। झालावाड़, सीकर, बाडमेर, बारां, चूरू, डूंगरपुर अर पाली मांय ईं ईद-उल-फितर अकीदत अर एहतराम रे साथे मनायी ज्यी।