सरकारी नौकरियां मांय अनुसूचित जाति-जनजाति रा उम्मीदवारां सारु आरक्षण रा बारा मांय सुप्रीम कोर्ट रा लारला दिनां दिया ज्या फैसला रे खिलाफ़ आज राख्यी ज्या भारत बंद रो प्रदेश मांय मिल्यो-जुल्यो असर रह्यो अर अमूमन शांति रही। राज्य मांय घणखर ठौड़ां बाज़ार बंद रह्या, हालांकि आपातकालीन सेवावां ने बंद ऊं न्यारी राख्यी ज्यी ही। राजधानी जयपुर मांय बंद ने ध्यान राखता थकां मोटी तादाद मांय पुलिस जाब्तो तैनात करी ज्यो हो। शहर मांय न्यारी-न्यारी ठौड़ां अनुसूचित जाति-जनजाति तबका रा लोग रैलियां निकाळ र प्रदर्शन कीना। झालावाड़ मांय खेल संकुल रा सामी ऊं सरु व्ही रैली मिनी सचिवालय पूग र अहलकारां ने पानड़ी सूंपी। चूरू, टोंक, भरतपुर, बाड़मेर, जालौर अर भीलवाडा समेत न्यारा-न्यारा शहरां मांय जुलूस निकाळी ज्या अर प्रशासनिक अहलकारां ने राष्ट्रपति रे नाम पानड़ी सूंपी ज्यी। खबरनवीसां सागे बातचीत करता थकां पुलिस महानिदेशक यू आर साहू कह्यो के पुलिस अर प्रशासन कानी ऊं करी ज्या माकूल इंतज़ामात रे कारण राज्य मांय छुट-पुट वारदातां ने छोड़ र सगळा ज़िलां मांय शांति सागे बंद राख्यी ज्यो।