अजमेर मांय चाल रह्या ख्वाजा साहब रा 813 वां उर्स मांय थावर ने प्रधानमंत्री नरेन्द्र मोदी री ओर ऊं चादर पेश करी ज्यी। केन्द्रीय अल्पसंख्यक कार्यमंत्री किरेन रिजिजू चादर चढ़ा र देश मांय अमन चैन अर भाईचारा री दुआ मांगी। ईं मौके वे बुलंद दरवाजा ऊं प्रधानमंत्री रो संदेश बांच्यो। प्रधानमंत्री वां रा संदेश मांय उर्स मांय शामिल व्हे रह्या ज़ायरीन ने शुभकामनावां देता थकां कह्यो के ख्वाज़ा साहब कानी ऊं दिया ज्या जनता रा भला अर इंसानियत ऊं जुड़्या संदेश जनता रा मन मांय अमिट छाप छोड़ी है अर वां रा प्रति दुनिया भर मांय आस्था है। प्रधानमंत्री कह्यो के ख्वाजा साहब रा सालाना उर्स रो उत्सव लोगां रा आपसी जुड़ाव ने मज़बूत बणावण मांय मोटी भूमिका निभावेला। ईं पाछे श्री रिजिजू मौजूद लोगां ने सम्बोधित करता थकां कह्यो के अब बगत आ ग्यो है, जद भारत रो पूरो समाज एकजुट व्हे र दुनिया मांय शांति सारू काम करेला।श्री रिजिजू दरगाह रो वेब पोर्टल अर जायरीन सारू गरीब नवाज़ एप लॉंच किनो। ईं मौके केन्द्रीय मंत्री भागीरथ चौधरी, भाजपा रा अल्पसंख्यक प्रकोष्ठ रा राष्ट्रीय अध्यक्ष जमाल सिद्दीकी, अल्पसंख्यक मामलात मंत्रालय रा सचिव डॉ. चन्द्रशेखर कुमार अर संयुक्त सचिव श्रेसा सीशाइक मोहीद्दीन ई मौजूद हा ।