शुक्रवार ने अंतर्राष्ट्रीय वन दिवस मनायो जा रह्यो है। इण रो ईं साल रो मुद्दो “वन और भोजन“ जंगलात हलकां अर दुनिया मांय भोजन ऊं जुड़ी हिफाज़त बीचे खास रिश्ता माथे ज़ोर देवे है। वन दिवस रे मौके प्रदेश मांय ई न्यारा-न्यारा कार्यक्रम राख्यी ज्या। जयपुर मांय राख्यी ज्या राज्य स्तर रा जळसा मांय मुख्यमंत्री भजनलाल शर्मा, वन मंत्री संजय शर्मा, जनता रा नुमाइन्दा अर न्यारा-न्यारा अहलकार मौजूद हा। कार्यक्रम मांय मुख्यमंत्री कह्यो के कुदरत म्हाणी जिन्दगी री बुनियाद है, ईं कारण वां ने बचावण सारू हर रेहवासी ने जिम्मेदारी समझणी चाहिजे। वे कह्यो के म्हाणी संस्कृति मांय रूंखड़ा अर पहाड़ां री पूजा करी जावे है अर राजस्थान रो कुदरत ने बचावण सागे जूनो नातो है। वे जनता ऊं जंगलात हलका अर जैव-विविधता ने बचावण अर वां ने बधावण सागे आवती पीढ़ियां सारू हर्यो भर्यो अर स्वस्थ राजस्थान बणावण री अपील कीनी। मुख्यमंत्री कह्यो के मिशन हरियाळो राजस्थान रा तैत 50 करोड़ पौधा रोपणो तैय करी ज्यो है अर इण रा तैत चालू माली साल मांय सात करोड़ पौधा रोपी ज्या है। कार्यक्रम रे दौरान मुख्यमंत्री वन प्रशिक्षण और प्रबंध संस्थान री नींव रखी। वे प्रतापगढ़ कने सीतामाता वन्यजीव अभ्यारण्य मांय इको टूरिज्म ऊं जुड्या सुबीता अर भरतपुर अर जयपुर कने नाहरगढ बॉयोजिकल पार्क मांय इलेक्ट्रॉनिक गोल्फ कार्ट जनता ने सूंप्या। मुख्यमंत्री वन विभाग री ओर ऊं बणायी ज्या एप-डीजी वन री सरूआत ई कीनी, जो देश रो पहलो डिजिटल फोरेस्ट स्टेक है। ब मुख्यमंत्री ईं मौके पौधा ई रोप्या। वन अर पर्यावरण राज्य मंत्री संजय शर्मा ई कार्यक्रम मांय विचार बताया।