शिक्षा मंत्री मदन दिलावर बुधवार ने जयपुर मांय शिक्षा का अधिकार कानून रा तैत ऑनलाइन लॉटरी निकाळी। इंर् रे जरिए शैक्षिक सत्र 2025-26 सारू तीन लाख ऊं बत्ता बच्चां ने 34 हज़ार 799 गैर-सरकारी स्कूलां मांय मुफ़्त दाखिलो दियो जावेला। वेब पोर्टल माथे एप्लीकेशन आईडी अर मोबाइल नंबर डाल र मेरिट लिस्ट मांय बच्चां री स्थिति देखी जा सके है। मुफ़्त सीट माथे दाखिला सारू राज्य मांय 3 लाख 8 हज़ार ऊं बत्ता विद्यार्थियां री अर्जियां मिली। शिक्षा विभाग रा शासन सचिव कृष्ण कुणाल चयन प्रक्रिया री जाणकारी देता थकां बतायो के आज ऊं 15 अप्रैल, 2025 तांई स्कूलां मांय मेरिट रा आधार ऊं रिपोर्टिंग करी जा सके है। दाखिलो लेवण वाळा विद्यार्थियां ने 21 अप्रैल तांई जरूरी कागज़ात री जांच करावणी व्हेला। इंर् मौके शिक्षामंत्री कह्यो के आर.टी.ई. ऊं वंचित अर कमज़ोर तबका रा बच्चां ने मुफ्त भणाई-लिखाई रो सुबीतो मिल सकेला। वे बतायो के राइजिंग राजस्थान ग्लोबल समिट रे दौरान व्ह्या 261 करार ऊं करीब साढे 15 हजार करोड़ रुप्या रो निवेश व्हेला।