विधानसभा मांय सत्ता पख अर विपख रा सदस्यां बीचे रार हाल ई खत्म नी व्ही है ज्यीं कारण मंगलवार ने सदन री कार्रवाई विपख रा सदस्यां री गैर-मौजूदगी मांय चाली। कांग्रेस रा प्रदेश अध्यक्ष गोविंद सिंह डोटासरा समेत निलम्बित सगळा विधायक सदन मांय दियो ज्यो धरनो सोमवार ने खत्म कर दीनो हो। मंगलवार ने ई वां री बहाली माथे हालात साफ़ नी व्ह्या। सोमवार रा वाकया पाछे मंगवार ने हिफ़ाज़ती दस्ता वां ने विधानसभा भवन रा दरुजा माथे ई रोक दीना अर विधानसभा परिसर मांय दाखिल नी व्हेवण दीना। कांग्रेस रा विधायक मंगलवार ने सदन रा बाहर धरनो दीनो। खबरनवीसां सागे बातचीत करता थकां कांग्रेस रा महासचिव सचिन पायलट कह्यो के मंत्री ने वां रा कथित अपशब्दां माथे खेद जतावणो चाहिजे। दूजी कानी संसदीय कार्यमंत्री जोगाराम पटेल खबरनवीसां सागे बातचीत करता थकां कह्यो के सरकार रार मेटण री कोशिशां कीनी, पण डोटासरा अड़ रह्या है। पटेल कह्यो के डोटासरा स्पीकर सारू जो शब्द काम लीना वे निन्दा करण लायक है।