राष्ट्रपति द्रौपदी मुर्मू कह्यो है के आध्यामिकता रे ज़रिये जिंदगी अर समाज ऊं जुड़्या केई मुद्दां रा समाधान खोजा जा सके है। राष्ट्रपति मुर्मू शुक्रवार ने सिरोही ज़िला रा आबू रोड़ मांय ब्रह्मकुमारीज़ संस्थान मांय ‘‘स्वच्छ और स्वस्थ समाज के लिए आध्यात्मिकता’’ मुद्दा माथे राख्यी ज्या वैश्विक शिखर सम्मेलन रा उद्घाटन जळसा मांय बोल रही ही।राष्ट्रपति कह्यो के साफ़-सफ़ाई केवल बाहरी वातावरण मांय ही नहीं बल्कि विचारां अर कर्मां मांय ई व्हेवणी चाहिजे। वे कह्यो के दुनिया मांय बधती गर्मी अर पर्यावरण प्रदूषण री चुनौतियां रो सामो करण सारु सगळा ज़रुरी जतन करणा चाहिजे। राष्ट्रपति एक पेड़ मां के नाम अभियान ऊं जुड़बा री अपील ई कीनी। केन्द्र सरकार कानी ऊं कुदरती तरीका ऊं खेती करण ने बधावो देवण रो जिक्र करता थकां राष्ट्रपति कह्यो के इण ऊं सगळां ने पोषण वाळो अन्न मिलेला। कार्यक्रम मांय राज्यपाल हरिभाऊ बागड़े ई विचार बताया। कार्यक्रम ऊं पैली राष्ट्रपति संस्थान रा मानसरोवर मांय पौधा रोप्या। राष्ट्रपति एक और कार्यक्रम मांय बांसवाड़ा ज़िला रा मानगढ़ धाम मांय शहीदां ने सिरधा भाव सागे याद कीना अर धाम माथे हवन कीनो। वे वठे लगायी ज्यी जनजाति उत्पादां री स्टॉल्स ई देखी। ईं मौके राष्ट्रपति जनजाति समाज री जनता ऊं बच्चां ने भणावण री अपील कीनी। कार्यक्रम मांय राज्यपाल हरिभाऊ बागडे़ अर मुख्यमंत्री भजन लाल शर्मा ई सिरकत कीनी।