प्रधानमंत्री नरेंद्र मोदी सोमवार ने बिहार रा भागलपुर ऊं प्रधानमंत्री किसान सम्मान निधि री 19वीं किस्त जारी कीनी। ईं रा तैत नौ करोड़ 80 लाख किसानां रा बैंक खातां मांय 22 हजार 700 करोड़ रुप्या ऊं बत्ती रकम जमा करायी ज्यी। प्रधानमंत्री किसान सम्मान निधि री छठी वर्षगांठ रे मौके राख्यी ज्या ईं कार्यक्रम मांय प्रधानमंत्री कह्यो के लारला बरसां मांय सरकार री कोशिशां ऊं भारत री साखां री दिसावर मांय बिक्री घणी बधी है। पीएम किसान सम्मान निधि रो राज्य स्तर रो कार्यक्रम जयपुर मांय राख्यी ज्यो। इण मांय मुख्यमंत्री भजन लाल शर्मा कह्यो के आज प्रदेश रा 72 लाख किसानां रा बैंक खातां मांय 1400 करोड़ रूप्या ऊं बत्ती रकम भेजी ज्यी। मुख्यमंत्री प्रदेश मांय चलायी जा रही खेती-बाड़ी ऊं जुड़ी न्यारी-न्यारी योजनावां री सब्सिडी रा चैक ई किसानां ने दीना। श्री शर्मा राज्य कृषि प्रबन्धन संस्थान मांय लगायी ज्यी प्रदर्शनी देखी अर किसानां सागे बातचीत कीनी। आज प्रदेश रा सगळा जिला मुख्यालयां माथे ई ईं कार्यक्रम रो सीधो प्रसारण करी ज्यो। पाली मांय ईं रो फायदो लेवण वाळा किसान सम्मान निधि सारू प्रधानमंत्री रो आभार जतायो।