गरोदरपणा  आणि बाळंतपणाशी निगडित कारणांनी २०२३  या वर्षात जगात प्रत्येक दोन मिनिटाला एका महिलेचा किंवा दररोज ७०० महिलांचा मृत्यू झाला आहे. संयुक्त राष्ट्रांनी आणि जागतिक आरोग्य संघटनेनं आज जागतिक आरोग्य दिनानिमित्त ही आकडेवारी जाहीर केली आहे. या मृत्यूमागची कारणंही टाळता येण्याजोगी होती, अशी माहितीही अहवालात दिली आहे. २००० ते २०२३ या कालावधीत मातामृत्यूंचं प्रमाण ४० टक्के  कमी झाल्याचंही अहवालात म्हटलं आहे.

माता मृत्यू कमी करण्याचा वेग २०१६ पासून मंदावला आहे आणि २०२३ या वर्षात गरोदरपणात किंवा प्रसुतीच्या वेळच्या गुंतागुंतीमुळे दोन लाख ६० हजार महिला दगावल्या आहेत. यातले ९० टक्के मृत्यू हे कनिष्ठ किंवा कनिष्ठ मध्यम उत्पन्न असलेल्या देशांत झाल्याची माहिती अहवालात दिली आहे.