नॅशनल टेस्टिंग एजन्सी – एनटीएनं रद्द केलेल्या आणि पुढे ढकललेल्या परीक्षांच्या तारखा जाहीर केल्या आहेत. एनटीएनं काल जाहीर केलेल्या अधिसूचनेत यूजीसी- नेट जून २०२४ ची परीक्षा २१ ऑगस्ट ते ४ सप्टेंबरदरम्यान घेतली जाणार आहे. परीक्षेत गैरप्रकार झाल्याचं उघडकीस आल्यामुळे ही परीक्षा रद्द करण्यात आली होती. संयुक्त CSIR-UGC-NET परीक्षाही पुढे ढकलण्यात आली होती. ती आता २५ ते २७ जुलै दरम्यान घेण्यात येईल. एकात्मिक शिक्षक प्रशिक्षण कार्यक्रम-ITEP मध्ये प्रवेशासाठी घेतली जाणारी राष्ट्रीय सामाईक प्रवेश परीक्षा १० जुलै रोजी होणार आहे. अखिल भारतीय आयुष पदव्युत्तर प्रवेश परीक्षा २०२४ ही मूळ वेळापत्रकानुसार ६ जुलैला घेतली जाणार असल्याचं एनटीएनं सांगितलं. तसंच उमेदवारांनी अधिक माहितीसाठी www.nta.ac.in या संकेतस्थळाला भेट देण्याचा सल्लाही एनटीएनं दिला आहे.