कोलकाता इथल्या आर जी कर वैद्यकीय महाविद्यालय आणि रुग्णालयातल्या आर्थिक गैरव्यवहारांच्या सी बी आय चौकशीला आव्हान देणारी संदीप घोष यांची याचिका आज सर्वोच्च न्यायालयानं फेटाळून लावली. संदीप घोष हे या संस्थेचे माजी प्राचार्य आहेत. कोलकाता उच्च न्यायालयानं या चौकशीचे आदेश सीबीआयला दिले असून आरोपी संदीप घोष यांना जनहित याचिकेत हस्तक्षेप करण्याचा कोणताही अधिकार नाही, असं सरन्यायाधीश धनंजय चंद्रचूड यांच्या अध्यक्षतेखालच्या पीठानं म्हटलं आहे.